Braam was die ideale kandidaat vir M-Net se “Boer soek ‘n vrou” – jonk, aantreklik en met baie ambisie om suksesvol te wees in alles wat hy aanpak. Maar hierdie melkboer van Meyerton het lank reeds sy hart verloor op ‘n donkerkop met bokkie-oë. Ek dink die “Sproetjies” wat Sias Reyneke destyds besing het, moes sekerlik soos Juanita gelyk het. Hierdie twee kom al van skool af saam en dis duidelik dat hulle beste vriende is wie se verhouding gebou is op wedersydse respek maar veral ook pret en ‘n goeie sin vir humor.

Braam en Johanita het ‘n pragtige dag gekies om die knoop deur te haak. Ons het egter skaars met die “couple shoot” begin toe daar ‘n lawwe reënbuitjie uitsak wat amper ons pret bederf het. Gelukkig is Three Rivers Lodge tans besig om hulle venue te vergroot op die erf net langsaan en ons het toe sommer daar by die bouperseel ons fotosessie voortgesit. Die lig op die balkon was absoluut stunning.

Geniet die kiekies! En dankie dat ek die dag kon vasvang. Dit was heerlik om julle beter te leer ken. Dankie ook vir Juan wat oudergewoonte my “wing man” was.